రానా కవితలు 8 జీవితం

 

జీవితం 

జీవితంలో బంధాలు

కొన్ని వస్తుంటే మధురంగా ఉంటాయి 

కొన్ని వెళ్తుంటే మధురంగా ఉంటాయి 

కొన్ని వృద్ధి చెందుతువుంటే  మధురంగా ఉంటాయి 

కొన్ని తరిగిపోతుంటేనే మధురంగా ఉంటాయి 

కొన్ని వదలుకోకపోతే మధురంగా ఉంటాయి 

కొన్ని వదులుకుంటే మధురంగా ఉంటాయి 

కొన్ని బంధాలు అప్రియ మవుతాయి 

కొన్ని అప్రియ బంధాలు మధురం మవుతాయి 

బంధాలు పుట్టుక్కుమనడానికి ఒక్క క్షణం చాలు 

కాని నిలుపుకోవడానికి ఓ జీవితకాలం కావాలి

ఈ బంధాలు తాత్కాలికం అని గ్రహించడమే విజ్ఞత!!!

జీవితంలో అవకాశాలు తలుపు తడుతూనే వుంటాయి 

కొన్ని రావడం సంతోషం ఇస్తుంది

కొన్ని రాకపోవడం సంతోషం ఇస్తుంది

కొన్ని వెళ్లకపోవడం సంతోషం ఇస్తుంది

కొన్ని అందలం ఎక్కిస్తాయి 

కొన్ని నేల చూపులు చూపిస్తాయి 

కొన్ని రావడం దుఃఖం తెస్తుంది

కొన్ని రాకపోవడం దుఃఖం తెస్తుంది

కొన్ని వెళ్లకపోవడం దుఃఖం తెస్తుంది

కొన్ని వైఫల్యాలు దుఃఖం తెస్తుంది 

కొన్ని అవమానాలను మిగులుస్తాయి 

ఓడి గెలిచినోడి అనుభవాలను తెలుసుకోవాలి 

ఓటమిలో నిలబడడం నేర్చుకోవాలి

వైఫల్యాలు వైవిధ్యఆలోచనలకు వేదిక కావాలి

అవి నూతన దశ,దిశలకు శ్రీకారం కావాలి!

కాలిలో ముల్లుగుచ్చుకుంటే నడక ఆగిపోదు,

ముల్లును తీసి జాగూరతతో ముందుకు సాగిపోవాలి,

అదేవిధంగా వైఫల్యాల అనుభవాలను సోపానాలుగా 

విజయకేతనాలను ఎగురవేయాలి!

జీవితంలో దారిద్ర్యం అంటే 

ధనం లేకపోవడం కాదు

సంపదలు లేకపోవడం కాదు 

వైవిధ్య భరిత ఆలోచనలను చేయలేక పోవడం

డబ్బుని అవసరానికి ఖర్చు చేయలేక పోవడం 

లోభం కలిగి వుండడం 

పరుల సంపదలను ఆశించడం 

ప్రభుత్వ ఉచితాలకు ప్రలోభపడడం 

వివేకం కలిగి ఉండకపోవడం 

విచక్షణ చూపించలేక పోవడం

అహంకారం కంటే ఆప్యాయత

సంపదకన్నా సంస్కారం

గర్వంకన్నా గౌరవం 

హోదా కన్నా హుందాతనం 

తీసుకోవడం కన్నా ఇవ్వడం 

మనసుకు సంతోషం కలిగిస్తుంది అని 

గ్రహించినా ఆచరించలేకపోవడం!!!

ధ్యాన మాలిక ఆగస్ట్ 26 సంచికలో ప్రచురితమైన జీవితం 

రానా కవితలు 7 విశ్వం చైతన్యభరితం

 

విశ్వం చైతన్యభరితం 

దేహామే క్షేత్రంగా నడిపించేది

ఆలోచనలను కలుగచేసేది

ఆలోచింప చేసేది 

ఆ ఆలోచనలతో నడిపించేది 

శ్వాస వెనుక వుండేది 

శ్వాసతో ముందుకు నడిపించేది 

ఆడించేది🤾‍♀️, పాడించేది🎵,నృత్యం 💃చేయించేది 

మనస్సును ఉరకలు వేయించేది 

మనస్సును నియంత్రించేది 

జీవనయానం కొనసాగించేది

అది 

వీక్షణా రహితం,

గంధ రహితం,

శ్రవణ రహితం,

స్పర్శ రహితం 

రస రహితం, 

కానీ 

శక్తి భరితం 

సదా తోడు నీడగా వుండేది 

నీలో, నాలో, మనందరిలో సంకల్పశక్తి !!

ఈ అనంత విశ్వాన్ని నడిపించేది

ఋతుపవనాలుగా సర్వత్ర విస్తరింపచేసి వర్షించేది 

శీతల పవనాలతో సేద తీర్చేది

నదులను ఉరకలు వేయిస్తూ ముందుకు సాగించేది

పుడమిని సాగుజలాలతో పలకరించేది, పులకరింపచేసేది

విత్తనంలో జీవంని ప్రేరేపించేది, జీవింప చేసేది 

పిలక,మొక్క,చెట్టుగా విస్తరింప చేసేది

పుష్పించేది,వికసించేది,ఫలసాయం అందించేది

ఆకలి కలిగించేది, ఆకలిని తీర్చేది 

సకల సృష్టికి చేయూత అందించేది

కంటికి కనిపించని

పంచభూతాత్మక శక్తులను నియంత్రించేది

ఇంద్రియాతీతంగా, గుణాతీతంగా వుండేది 

ఆది అంతంలేని అప్రమేయ స్వరూపంతో 

అవ్యక్తం, అచింత్యం అయిన 

అలౌకిక పరాశక్తి!!!

యంత్ర, తంత్ర, మంత్ర శక్తులను వక్రీకరించి 

అన్య సంపదలను ఆశింపచేసేది 

ఇతరుల పతనం కోరుకునేది

అమాయకులను మోసగించేది 

ఇతరుల ఆస్తులను దోచుకునేలా చేసేది 

స్త్రీలని మభ్యపరచేది,లోబరచుకునేది

చిల్లంగి, చేతబడి, వశీకరణ,కాటేరి 

వంటి క్షుద్రశక్తులు

దైవిక శక్తి ⚡️ లో భస్మీపటలం అయ్యేవి.

సర్వం చైతన్య భరితం, శక్తి భరితం 

సర్వం చైతన్య మయం,శక్తి మయం 

సర్వం శివశక్తి చైతన్య రూపం..

రానా కవితలు 6 ప్రేమంటే….

 ప్రేమంటే…

మనకి 

డబ్బు 💵 లంటే ప్రేమ 

నగ 💍 లంటే ప్రేమ

సంపద 💎 లంటే ప్రేమ 

పదవి, పదోన్నతిలంటే ప్రేమ 

ఆస్తులు 💰కూడబెట్టడమంటే ప్రేమ 

పేరు, ప్రఖ్యాతులంటే  ప్రేమ 

కీర్తి,ప్రతిష్ఠలంటే ప్రేమ

గౌరవ మర్యాదలంటే ప్రేమ 

అహం అంటే ప్రేమ 

సౌకర్యాలంటే ప్రేమ

విలాసవంతమైన కార్లు 🚗 అంటే ప్రేమ 

ఖరీదైన 🫰 బంగ్లాలంటే ప్రేమ

కాసినో, బెట్టింగ్, లాటరీలలో వచ్చే డబ్బు లంటే ప్రేమ 

షడ్రుచులతో నిండిన విందు లంటే ప్రేమ 

ప్రేమంటే ఇదేనా? ఇంతేనా!!!

ప్రేమంటే కోరికలను తీర్చడం,కోరుకోవడం కాదు 

పాపాయి చిరుబొజ్జని స్తన్యంతో నింపేది మాతృ ప్రేమ 

బుడి బుడి అడుగుల బోసినవ్వులే పాపాయి ప్రేమ

సదా తనవారి శ్రేయస్సునే కోరుకునేది అమ్మ నాన్నల ప్రేమ 

కడదాకా చేయి వదలని అన్యోన్య దాంపత్యమే ప్రేమ 

ప్రేమంటే ఇచ్చేది ,తీసుకొనేది కాదు 

చిరు జీవాల ఆకలి,దప్పికలకు స్పందనే కరుణ

సాధుజనులకు ఆతిథ్యం దయాభరిత ప్రేమ 

క్షుద్బాధ తీరిన ఆర్తీ కంటి మెరుపులే ప్రేమ

ఉషోదయంలో …

పురివిప్పి నాట్యం చేసే మయూరి

పక్షుల కిలకిల రావాలు ప్రకృతి మీది ప్రేమ

ప్రేమంటే త్యాగం,ఆశించడం కాదు

మన ఆకలి తీర్చే రైతన్న పాడిపంటలే ప్రేమ 

జన్మభూమి కోసం సిపాయి ప్రాణత్యాగమే ప్రేమ

ప్రేమంటే…

పరమాత్మ యందు అకుంఠితదీక్షనే ప్రేమ

అప్రమేయుడి యందు అంకితభావమే ప్రేమ

విశ్వంభరుడి యందు అనన్యభక్తినే ప్రేమ

మాధవుడికి సమర్పించే కర్మఫలాలే ప్రేమ 

అవ్యయుడి యందు అనన్యచింతనే ప్రేమ

జగద్గురు యందు సమర్పణభావమే ప్రేమ

ప్రేమంటే మానవీయత 

ప్రేమంటే చిరుదివ్వేలా చీకటిలో వెలుగు 

పరోపకారార్ధం జీవించడమే దయాభరిత ప్రేమ 

సకల జీవరాశి శ్రేయస్సును ఆకాంక్షించడమే ప్రేమ

ప్రేమను పంచుకుంటే పెరిగే తరగని పెన్నిధి 

మానవతా విలువల మణిహారం ప్రేమ

ఆధ్యాత్మిక పధం 26 సర్వమతసమన్వయ గీతిక

                  సర్వమతసమన్వయ గీతిక 

అనాదిగా హైందవ సమాజం విభిన్న సంస్కృతులు, ఆచారవ్యవహారాలు, సంప్రదాయాలు, సిద్ధాంతాలు, దృక్కోణాలు,దృక్పథాలు,నైతిక విలువల సంగమస్థావరం. హిందుత్వం ఆ సంగమస్థావరం నుండి కార్యోన్ముఖంగా నిశ్చల గంగ ఝరిలా యుగయుగాలుగా తన నిరంతర పయనం కొనసాగిస్తూనే వుంది.

నమ్మకం, విశ్వాసం,సమర్పణభావం,అంకితభావం,భక్తి శ్రద్ధలతో పరమపావని గంగమాత దరి చేరిన వారి మదిని పవిత్రం చేస్తూనేవుంది. 

మనం అంతర్గత సంస్కారాల ప్రభావంతో విభిన్న ఆలోచనాధోరణిని కలిగి ఉంటాం. అందుకే మన ఆలోచనలు, ప్రవర్తనలు, వ్యక్తిగతప్రణాళికలు, కర్తవ్య నిర్వహణలలో సారూప్యత కలిగి ఉండకపోవచ్చు.

మనలో కొందరి చిత్తం సహజంగా క్రియాశీలకం. వీరు పని రాక్షసులు. ప్రతిఫలం లేదు అంటే ఎందుకు పనిచేయాలి అనే ధోరణి కూడా కలిగి ఉంటారు. వీరు కుటుంబబాంధవ్యాలతో మమేకమవుతూ రాగద్వేషాలలో పెనవేసుకపోయి మొహభరిత జీవనయానం కొనసాగిస్తుంటారు. వీరు అపరిమిత కోరికలు, వాంఛలతో ధర్మగతిని వదిలి క్రియాశీలక జీవనానికి అలవాటు పడుతారు, నైతిక విలువలకు తిలోదకాలు ఇస్తారు. ఫలితంగా ఎవరికి ఏమైతే నా కేంటి, నాకు కాసులపంట పండితే చాలు అనే విపరీతధోరణి ప్రదర్శిస్తుంటారు.

ఇలాంటి ఆలోచనల ప్రభావంతోనే వంటనూనెలలో జంతుకొవ్వు, నెయ్యిలో కూరగాయల నూనె,పాలలో 🥛డిటర్జెంట్,యూరియా, ఇష్టంగా తినే ఐస్ క్రీమ్ 🍦 లలో మల్టోడిస్రీన్ అనే హానికరమైన కెమికల్, పసుపు, జీలకర్రలలో సింథటిక్ కలర్స్, కారం, కుంకుమలలో ఇటుకపొడి, మిరియాలలో బొప్పాయి గింజలు, మనం ఇష్టంగా తినే మామిడి🥭,ఆపిల్🍎,పుచ్చకాయ 🍉లు కూడా కల్తీలుగా, కాదేదీ కల్తీకి అనర్హం అంటూ ప్రజల జీవితాలతో, ప్రాణాలతో చెలగాటమాడుతున్నారు. వీరు ఇలా మూటలుగట్టి పాపకర్మలు, నీచకర్మలు ఆచరిస్తూనే ఉంటారు.

వీడు ఎంత సంపాదించినా💰తనలోని బాధలను , అమ్మలేడు..తను తాపత్రయపడే సంతోషాన్ని, కొనలేడు..ఆరోగ్యాన్ని, అరువు కూడా తెచ్చుకోలేడు...మనఃశాంతిని ఎప్పటికీ పొందలేడు.అని గ్రహించలేని మందబుద్ధి.

వీరు పుణ్య తీర్థాలలో చేసే నదీస్నానాలు,ఉపవాసాలు, జపాలు, దానాలు,పూజలతో పుణ్యం లభించదు.హృదయంలో పరివర్తనం రానంతవరకు ఎన్నిసాధనలు చేసినను  వాటి ప్రయోజనం శూన్యం.

ఇటువంటి అల్పుడు,అజ్ఞానికి ఆధ్యాత్మిక భావనలు అతని కలుషిత హృదయంలోనికి ఏలా చేరుకుంటాయి!! వీటి ఫలితంగా లక్ష్యం 🎯 నందు గల ఆసక్తి లక్ష్యసాధనలో పూర్ణంగా కొరవడుతుంది.

అయితే చేసిన పాపకర్మలకు హృదయపూర్వకంగా పశ్చాత్తాపంతో అప్రమేయుడికి అంకితభావంతో సమర్పణ చేస్తూ, ప్రతిఫలాపేక్ష రహితంగా నిష్కామకర్మచరణ అనుష్ఠానం ద్వారా వారికి ఆధ్యాత్మిక మార్గంలో పయనం సుగమం అవుతుంది.

కొందరి ప్రవర్తన సహజంగా ఉద్వేగభరితం.వీరు భక్తిమార్గం లోనికి ఆకర్షింపబడి ఆ మార్గం అనుసరిస్తారు.

అయితే వీరిలో కొందరు ఆచారాలు, సంప్రదాయాలను వక్రీకరించి జాతివివక్షణతో సమాజాన్ని కులాలుగా విడదీస్తూ హైందవ సమాజ పురోగతికి అడ్డుగోడలవుతున్నారు!

మరి కొందరు మూఢభక్తి, మూఢనమ్మకాలు,అంధవిశ్వాసాలతో ఇష్ట దేవతారాధనలలో, జాతరలలో జంతుబలులను నైవేద్యంగా సమర్పిస్తూ తమ వాంఛలను, కోరికలను నెరవేర్చుకునే ప్రయత్నం చేస్తుంటారు! సర్వం పరబ్రహ్మ చైతన్య స్వరూపం అయినపుడు తమ కోరికలు, వాంఛలను నెరవేర్చుకోవడం కోసం ఇతర ప్రాణులను జంతుబలులుగా సమర్పించడం ఏలా సమర్ధనీయం!? ఇది విశ్వసౌభ్రాతృత్వమును అవహేళన చేయడమే అవుతుంది కదా? ఇటువంటి ధోరణితో ఆత్మపౌమ్యస్థితికి ఎలా చేరుకుంటారు? మీ ఇష్టదైవం ఇలాంటి చర్యలను హర్షిస్తాడా? ఆయన అనుగ్రహం ఆశించడం అంటే అది వాస్తవానికి అపాత్రదానమే అవుతుంది కదా?

దైవదర్శనంలో నూతన పోకడలుగా విశిష్ట దర్శనం,విశేష దర్శనం, శ్రీఘ్ర దర్శనం, నేత్రదర్శనం అని భక్తుల పర్సులను ఖాళీ చేయడం ఎంతవరకు సమర్ధనీయం? 

నేటి ప్రభుత్వాలు అగ్నికి ఆజ్యంలా భక్తులు భగవంతునికి సమర్పించే మాన్యాలు, నగలు,హుండీకానుకలను చెరపట్టి స్వామివారి సంపదలను అక్రమంగా అనిర్దేశిత కార్యాలకు తరలిస్తూ భక్తుల మనోభావాలకు తీవ్ర విఘాతం కలిగించడం ఎంతవరకు సమర్ధనీయం?

ఇటువంటి అనైతిక అనాచరణ సాంప్రదాయాల ఆచరణలతో జీవిత విలువలకు తిలోదకాలు ఇస్తూ పతనం అంచులకు చేరుకుంటారు. ఈ ఊసరవెల్లిక్షేత్రాలు బీడుభూములు గాకుండా వ్యవసాయక్షేత్రాలుగా ఏలా అవుతాయి?

ఆధ్యాత్మిక భావనలలో గల ప్రీతి, ఆసక్తి , పవిత్రత, సమర్పణ, అంకిత భావం వీరి ఆచరణలో లుప్తం అవుతుంది . సాధ్యవస్తువు నందు ఉన్న అపారప్రీతి సాధనలో వీరికి రిక్త హస్తాలతో శూన్యంగా మిగిలి పోతుంది.

కారుణ్యమూర్తి, పరమ దయాసాగరుడు అయిన సర్వాంతర్యామిని ఎవరైతే తమలోని అహంకారన్ని సంపూర్ణంగా త్యజిస్తూ ఆత్మతత్వమును అర్ధం చేసుకుని హృదయమును పరిశుద్ధం చేసుకుంటూ దృఢచిత్తం, అంకిత భావం,సమర్పణభావనలతో విశ్వసౌభ్రాతృత్వమును ఆకాంక్షిస్తూ, ఆ సర్వేశ్వరుడి అనుగ్రహంకోసం సదా పరితపిస్తూ వుంటారో వారి యోగక్షేమాలను ఆ అప్రమేయుడు స్వయంగా స్వీకరిస్తారు,వారి ఆధ్యాత్మిక మార్గపయనం సుగమం అవుతుంది. అంతర్యామి అనుగ్రహం, కృపలకు ప్రీతిపాత్రులు   అవుతారు.

కొందరి ఆలోచనలు ఉపాసనశీలమైనవి, వారు అంతర్ముఖులుగా ధ్యాననిష్ఠను కలిగి ఉంటారు,

వీరు శుద్ధచైతన్య సాత్వికస్వభావంతో ఇతరులకు హాని కలిగించే ఆలోచనలు మదిలో కూడా తలంచరు. ఇతరుల హితం ఆకాంక్షింస్తూ అందరి యందు సౌభ్రాతృత్వం కలిగివుంటారు. లోక కళ్యాణం ఆశిస్తూ సర్వాంతర్యామిని ఆరాధిస్తుంటారు. అహంకార రహిత కర్తృత్వభావనతో ఆదర్శప్రాయులుగా, మార్గనిర్దేశకులుగా ఆధ్యాత్మిక పురోగతిలో ముందడుగులేస్తుంటారు. అయితే వీరిలో కొందరు తమ ప్రవర్తనలో అహంకారస్వభావులుగా, భోగసామగ్రి యందు మక్కువ కలిగి వాటిని పోగుచేస్తుంటారు.

కొందరు ధీశక్తిమంతులు. శుద్ధ చైతన్య స్వరూపులు, వివేక,విచక్షణభరిత భావనలతో వారు జ్ఞానమార్గంలో పయనిస్తారు. మానవాళికి శుభం,క్షేమం,శ్రేయస్సు కలగాలని అందరి జీవితాలు మంగళకరం కావాలి అనే ఆకాంక్షతో అనుష్ఠానం చేస్తువుంటారు. ఆలయదర్శనం, పూజలు,క్రతువులు, హోమాలు,యజ్ఞాలు నిర్వహించకపోయిన సదా తమ హృదయ క్షేత్రంలో స్థితుడైన భగవంతుని మనోనేత్రంతో వీక్షిస్తూ అలౌకిక ఆనందాన్ని అనుభవిస్తూ సోమరసపానంతో ఉంటారు. వీరు జీవన్ముక్తులు. ఈ జీవితకాలంలోనే భగవంతుని అనుగ్రహం పొందిన దివ్యాత్ములు.

దృక్పథం,దృష్టికోణం,వివేకం,తత్వదర్శనంలతో ఎందరో మహానుభావులు తత్వజ్ఞానులుగా తమ విశేష మేధ, ప్రజ్ఞ, జ్ఞాన నిధులతో హైందవ సమాజానికి కరదీపికలుగా మార్గదర్శులుగా నిలిచి తమ తాత్వికభావనలతో ప్రవక్తలగా లబ్ధప్రతిష్టలతో స్వయంప్రకాశితులుగా అజరామర కీర్తిని గడించారు. 

బ్రహ్మము మాత్రమే సత్యం, ప్రపంచం మిథ్య, జీవుడు బ్రహ్మమే. జ్ఞానం ద్వారా మాయను తొలగించి జీవుడు బ్రహ్మలో లీనం కావడం మోక్షం అని అఖండ భారతం పర్యటిస్తూ జ్ఞానబోధ గావించిన మహనీయుడు, మానవీయుడు  అద్వైత సిద్ధాంత ప్రవక్త శ్రీ శంకరాచార్యులు. విష్ణుసహస్రనామాలకు వ్యాఖ్యానం వ్రాసి శివకేశవలిరువురూ ఒకటేనని బోధించిన దివ్యజ్ఞాని.

శరణాగతి, అనన్యభక్తి, అనన్య చింతనల ద్వారా పరమాత్మ శ్రీమన్నారాయణుడుని చేరువవ్వడం మోక్షం అని ప్రభోదించిన విశిష్టాద్వైత ప్రవక్త శ్రీ రామానుజాచార్యులు సమతమూర్తిగా విశిష్ట గౌరవాన్ని అందుకున్నారు. ఈ సమతామూర్తి తమ ఆధ్యాత్మిక ప్రవచనాలద్వారా భగవంతుని దృష్టిలో మానవులందరూ సమానమేనని, కుల వివక్ష పనికిరాదని ఎలుగెత్తి చాటారు. నిమ్న జాతుల వారికి ఆలయ ప్రవేశం కల్పించారు. శిథిలావస్థలో ఉన్న అనేక వైష్ణవాలయాలను పునరుద్ధరించారు. ‘ఓం నమో నారాయణాయ' అనే అష్టాక్షరీ మంత్రాన్ని ఉపదేశామృతంగా మానవాళికి అందించారు.

జీవుడు (ఆత్మ) వేరు, ఈశ్వరుడు (పరమాత్మ) వేరు. దేవుడు సర్వోత్తముడు, జీవుడు సేవకుడు.సద్భక్తి ద్వారా భగవంతుని సేవించి పరమపదం చేరుకోవచ్చు అని ద్వైత వేదాంతాన్ని ప్రబోధించిన ప్రముఖ హిందూ తాత్వికుడు పూర్ణప్రజ్ఞ, ఆనందతీర్థ శ్రీ మధ్వాచార్యులు. శ్రీకృష్ణుడే పురుషోత్తముడు, సర్వోత్తముడని భక్తి మార్గాన్ని, తత్త్వవాదాన్ని దశదిశల వ్యాప్తి చేశారు.

మార్పులేని పరమ సత్యమైన బ్రహ్మం శివుడు. విష్ణువు శివుని యొక్క అత్యున్నత అవతారం, శివుడు విష్ణువు యొక్క అత్యున్నత అవతారం అని శివకేశవులు పరమాత్మ స్వరూపభావనతో తరించిన తత్వవేత్త, శివుడే పరమాత్ముడని, సృష్టికి మూలమని అని ప్రబోధించిన శివ విశిష్టాద్వైత సిద్ధాంతప్రవక్త, సిద్ధాంత శిఖామణి శ్రీకంఠ శివాచార్యులు. 

బ్రహ్మం ఒక్కటే, పరబ్రహ్మం ఒక్కటే అయితే సాధకులు సాధనతో చేరుకునే మార్గాలు విభిన్నం, కానీ వాటి పరమార్ధం ఒక్కటే అని స్వమతసంస్తుతి , స్వమార్గపరిపోషణలకు అతీతంగా సౌభ్రాతృత్వంతో మానవాళి విరియాలి అని సర్వయోగసమన్వితగా  గీత ప్రబోధిస్తుంది. హిందుత్వం అనేది ఓ మతప్రతిపాదిక విధానం కాదు అది మానవాళికి జీవనశైలి, జీవనయానం, పరమాత్మకు చేరువచేసే ముక్తిమార్గం.

సర్వేజనా సుఖినోభవంతు

మీ ఆధ్యాత్మిక శ్రేయోభిలాషి

RaNa 

9900022729

🧘‍♀️🧘‍♀️🧘‍♀️🧘‍♀️🧘‍♀️🧘‍♀️🧘‍♀️🧘‍♀️

#divineguidance #yogameditation 

#yogalifestyle 

#yogainspiration #yogamitra 

ధ్యాన మాలిక జూలై 26 సంచికలో ప్రచురితమైనది.

ఆధ్యాత్మిక పధం 25 విశ్వం విష్ణు స్వరూపం

 

విశ్వం విష్ణు స్వరూపం 

అజరామరం, అద్వితీయం , అనంతం , అప్రమేయం అయిన ఈ విశాల విశ్వం ఓ మహా ద్రవ్యరాశి. అవ్యక్తం, అచింత్యం మయిన ఈ సృష్టి సాక్షాత్ ఆ విశ్వంభర దివ్యస్వరూపం.  

పరబ్రహ్మ సృష్టికర్త, పరబ్రహ్మ పదార్థం ఆయన సృష్టి. ఈ పరబ్రహ్మ పదార్థం మహిమాన్వితం, చైతన్యవంతం, జీవభరితం. ఈ జీవభరిత జీవనపదార్ధం అనంత విశ్వంలో విష్ణువుగా విస్తరించిన దివ్యపదార్థం. ఇది నిరాకార, నిర్గుణ సహిత జీవాత్మగా కల్పారంభంలో పరమాత్మ నుంచి ఆవిర్భవించిన మరణం ఎరుగని మనలోని జీవాత్మ.

సృష్టి, సృష్టికర్త వేరు వేరు కాదు అని అంతర్ముఖుడు అయిన తత్వవేత్త ఎరుకతో గ్రహించిన సత్యశోధన. తత్వవేత్త అయిన యోగీశ్వరుడు అవిభాజ్యమైన పరమాత్మ సృష్టిలో, ప్రతి జీవిలో పరమాత్మ స్వరూపం అయిన జీవాత్మ అని గ్రహించాడు, మనోనేత్రంతో వీక్షించాడు, తరించాడు. ఈ తత్వదర్శి అయిన జ్ఞాని ఏ జీవికి అపకారం కల్గించే ఆలోచనను మనస్సులో కూడా తలంచడు.  ఈ కర్మ యోగి పరమాత్మకు అత్యంత ఇష్టసఖుడు, అతనిలోనే ఉపద్రష్టగా ఆసీనుడవుతాడు.

అవ్యక్తం అంటే కంటికి గోచరం కానిది, అంటే దృష్టి 👁️ కి అందనిది. మానవ నేత్రం చూడలేనిది, అంతే కానీ ఏమీ లేదు అనే శూన్యం అజ్ఞానం కాదు.

బావిలోని కప్ప 🐸 దృష్టి పరిమితం అంటే బావిని దాటి బయటకు చూడలేడు. దాని దృష్టిలో ఈ ప్రపంచం ఇంతకు మించి ఏమీ కాదు.

అచింత్యం అంటే ఊహలకు, ఆలోచనలకు అందనిది.

అదే  మండుకం యాదృచ్ఛికంగా ఓ కొండ కొలనుకు చేరితే దాని ఆలోచన పరిధి, ఊహలలో ఈ ప్రపంచం అది తను ఉన్న బావికంటే, కొలను కంటే విస్తృతం, విశాలం అని భావించవచ్చు. మనం ఈ కుటస్థ మండుక స్వభావాన్ని కలిగి వుంటాం, ప్రదర్శిస్తూంటాం.

ఈ అనంత విశ్వం 🪐 కూడా సామాన్య దృష్టికి అవ్యక్తం, అచింత్యం, 

మేధావి, జ్ఞాని, జిజ్ఞాసి,తత్వవేత్త, జితేంద్రియుడు, యోగీశ్వరుడు, అంతర్ముఖుడు, సత్యాన్వేషి, శాస్త్రవేత్త, సాధువు,శాస్త్రజ్ఞుల దృష్టిలో ఈ విశ్వం అసామాన్యం, అప్రమేయం,అద్వితీయం, అజరామరం.

ఆరు బయట వినీల ఆకాశాన్ని రాత్రి సమయంలో ఆసక్తితో వీక్షిస్తే అసంఖ్యాక నక్షత్రాలు, నక్షత్రమండలాలు , నక్షత్రరాశులను మన కన్ను చూస్తుంది. ఇవి అన్ని సృష్టిలోని ఓ పాలపుంత “గెలాక్సీ “ కుటుంబసభ్యులు మాత్రమే. ఓ అధునాతన టెలిస్కోప్ వ్యవస్థ 🔭 ద్వార ఈ అనంత విశ్వంలో అనేకానేక పాలపుంతలను వీక్షించవచ్చు. ఈ అపూర్వ ఖగోళ జ్ఞానం కోసం మీ కుటంబ సభ్యులతో ఓ సారి నక్షత్రశాలను తప్పక దర్శించండి. మిమ్మల్ని మంత్ర ముగ్ధులను చేసే ఖగోళ విశేషాలను, నక్షత్రాలను, తోకచుక్కలను, ఉల్క ☄️ లను, సౌరకుటుంభం, పాలపుంతల అనుభూతులను సొంతం చేసుకోండి. 

ఈ విశాల విశ్వంలో ఓ గెలాక్సీ 🌌 లోని అనంత నక్షత్రాల సమూహల సముదాయంలలో మన కంటికి గోచరించే అతి దగ్గరి నక్షత్రం సూర్యుడు 🌅ఈ సౌరకుటుంబంలోని నవగ్రహాలలో మనం నివసించే ఈ భూమి 🌍ఓ గ్రహం మాత్రమే! మనకు దగ్గరిగా అగుపించే చంద్రుడు 🌒 ఈ భూమికి ఓ ఉపగ్రహం మాత్రమే. ఈవిశాల విశ్వంలో మనం నివసించే భూమి పరిమాణం అల్పం, బహుశా సముద్రంలో ఓ నీటి చుక్క లాంటిది!! 

ఇంతటి అల్పపరిమాణంలో ఉండే ఈ భూమండలంలో నీ దేశం సూక్ష్మం. అందులో నీవు నివసించే నగరం అతిసూక్ష్మం. ఈ అతిసూక్ష్మంలో నాది అని భావించే పొలాలు,ఇల్లు,పాడి పంటలు, మణులు మాణిక్యాలు, నగలు,సంపదల పై ఇంతటి తాపత్రయం, మోహం, అపేక్ష అవసరమా? మిమ్మల్ని మీరే ప్రశ్నించుకోండి. సమాధానం మీకే అవగతం అవుతుంది.

సృష్టి, స్థితి,లయ,తిరోధాన,అనుగ్రహం అనే పంచ కృత్యముల విధాత సర్వాంతర్యామి !!

మనం తీసుకునే శ్వాస ప్రాణ, అపాన,వ్యాన,ఉదాన,సమాన పంచప్రాణాలుగా జీవుడి మనుగడకు అధిపతిగా అంతర్యామిగా జీవులలో ఉపస్థితుడు.  

మనం ఆశించి,కాంక్షించి,వాంఛించి,అపేక్షించి మన ఇష్టదైవానికి సమర్పించే భక్తిపూర్వక ప్రార్థనలు, నామ స్మరణలు, సంకీర్తనలు, అర్చన పూజలు, వ్రతాలు, క్రతువులు, హోమాలు, యజ్ఞాల వంటి సకామ కార్యకర్మలు మీకు ఇష్ట ఫలాలను అనుగ్రహించవచ్చు, కానీ ఇది అన్యభక్తి మాత్రమే. సకామకార్యకర్మ ఫలాలకు అతీతమైనది ప్రతిఫలాపేక్ష రహితం అయినది అనన్యభక్తి.

శ్రీ కృష్ణ పరమాత్మ ప్రబోధించిన మహామంత్రం “అనన్యాశ్చిన్తయంతో మాం యే జనాః పర్యుపాసతే |తేషాం నిత్యాభియుక్తానాం యోగక్షేమం వహామ్యహమ్ || “

అనన్యభక్తితో దైవాన్ని ధ్యానించే భక్తుని యోగక్షేమాలను దైవమే భరిస్తాడు!! 

అప్రమేయుడు, అంతర్యామీ, సర్వేశ్వరుడైన భగవంతుడి అనుగ్రహం పొందానికి అనన్యభక్తి సాధనే జీవితపరమార్ధంని అవగతం చేసే మహామంత్రం!!!

ఈ ప్రపంచంలో నీవు ఒంటరి వాడివి కాదు అని పరమాత్మ ఇస్తున్న అనుగ్రహపూర్వక అమృతవాక్కు!!!

ఇది ఊగిసలాడే మనస్సుకు ధైర్యం, అలసిన హృదయానికి స్వస్థత,అనిశ్చితిలో అలమటించే ఆత్మకు నిలయదార్శనం…

భక్తి అంటే ఒక సంప్రదాయం, ఆచారం కాదు అది జీవనవేదం, జీవనసారం.

ధ్యానం అంటే కేవలం శ్వాస మీద ద్యాసతో కూర్చోవడం కాదు, అది మనస్సులో అంతర్వాహిని..

దేవుడు సుదూరంలో కాదు, హృదయాంతరాలలో ఉపస్థితుడు.

భక్తుడు దైవాన్ని అనన్య చింతన, భక్తి శ్రద్ధలతో అనుసరిస్తున్నట్టు అగుపించినా, వాస్తవానికి దైవమే భక్తుని చేతిని పట్టుకొని యోగక్షేమ మార్గంలో నడిపించే మార్గదర్శి.

సర్వేజనా సుఖినోభవంతు

మీ ఆధ్యాత్మిక శ్రేయోభిలాషి

RaNa 

9900022729

🧘‍♀️🧘‍♀️🧘‍♀️🧘‍♀️🧘‍♀️🧘‍♀️🧘‍♀️🧘‍♀️

#divineguidance #yogameditation 

#yogalifestyle 

#yogainspiration #yogamitra 

రాన కవితలు 5 అపరిగ్రహం

 

అపరిగ్రహం 

వర్షించే మేఘాలు 🌧️నిరాపేక్షగా 

పుడమి తల్లి దాహం తీరే వరకు,

నది జలాలు 🌊తమ దాహం కోసం 

ఊటబావి నీళ్లు తమ కోసం 

పంటకాల్వలలోని సాగునీరు తమకోసం 

సరస్సులు 🏝️తమ మధుర జలాలను తమ కోసం

మంచి నీటి చెలమలు చివరి నీటిబొట్టు వరకు 

కొద్దిపాటి జలాలను కూడా దాచుకోవు, వాడుకోవు 

అనాసక్తిగా సంపదలను జీవరాశి మనుగడ కోసం

అపరిగ్రహంగా ఇవ్వడం మాత్రమే వాటికి తెలుసు !!!

కూరగాయపాదులు తన కూరగాయలను ,

చెట్లు 🌴తమ మధుర ఫలాలను ,

పూల వనాలు విరభూసిన పరిమళ భరిత 🌸పుష్పాలను,

పండ్ల తీగలు తమ 🍇పండ్లను,

పండ్ల తోటలు తమ ఫలసాయాన్ని,

తమ కోసం దాచుకోవు, వాడుకోవు 

అపరిగ్రహంగా ఇవ్వడంలో ఆనందం ఆస్వాదిస్తాయి!!

విత్తనంగా వున్న తనని 🐜చీమలు,

మొలకగా 🌱వున్న తనని 🦆పక్షులు,

మొక్కగా వున్న తనని పశువులు 🐄తినాలని చూస్తాయి,

అయితే ?!

అదే 🌴చెట్టుగా ఎదిగిన తరువాత 

శుచిర్దక్షగా,అనపేక్షగా,ఉదాసీనంగా, అపరిగ్రహంగా 

చీమలు, పక్షులు,పశువులను తన నీడలో సేద తీరుస్తుంది!

రాయి విసిరే చేతికి మధుర ఫలాలనే 🥭కానుకగా అందిస్తుంది!!

పక్షులకు నివాస 🪺స్థానంగా,

గురుకులంలో ఆసనస్థానంగా, 

ప్రకృతి ప్రేమికులకు వనాలలో ట్రీ హౌస్ గా,

సాధువులకు సత్సంగ వేదికగా,

రాజుగారికి సింహాసనంగా

అలలారిస్తుంది!!

ప్రార్థన మందిరాలలో 🕍ద్వారంగా ,

దైవదర్శనానికి ప్రవేశద్వారంగా ,

దేవాలయాలలో 🛕ధ్వజస్తంభంగా,

జగన్నాథుడు 🔱 దారు విగ్రహమూర్తిగా,

శోభ యాత్రలో జగన్నాథ రథంగా,

ఊరేగింపు సేవలో పల్లకిగా 

విరాజిల్లుతుంది!!!

ప్రకృతిలో సర్వం అపరిగ్రహ భావనతో 

మమేకమై సహజీవనం కొనసాగిస్తున్నాయి!!

లోభం, మొహం,క్రోధం, అహంలను 

ధరిచేయని వ్యక్తి పరిపక్వత సాధించిన 

మానవీయుడు, మహానీయుడుగా 

అప్రమేయుడు, అవ్యయుడు, విశ్వంభరుడి

సన్నిధిలో ఆనందభరిత

జీవనయానం కొనసాగిస్తాడు!!!

ఆధ్యాత్మిక పధం 24 అకర్మణ్యత్వం

 

అకర్మణ్యత్వం 

మనం చేసే ఏ పని అయినా కర్మనే అవుతుంది. జీవుడు కర్మ బద్దుడు. తన పనులు తను చేయడం అతని కర్తవ్యం కూడా! అందుకే కర్తవ్యం నీ వంతు, కాపాడుట నా వంతు అని విశ్వంభరుడు జగద్గురువుగా మానవవాళికి ప్రబోధించాడు. 

సమాజంలో ఓ విపరీత పోకడను ప్రత్యేకించి ఉన్నత మధ్యతరగతి, ధనికవర్గలలో మనం గమనించవచ్చు.

ఈ తరగని ఆస్తులను సంపాదించడం నా పిల్లలు భవిష్యత్తులో కష్టపడకుండా సుఖంగా వుండాలి అని ఆశించడంలో తప్పు ఏముంది, ఇది నా బాధ్యత కూడ కదా?

ఇక వారి పిల్లలు మేమెందుకు పనిచేయాలి ? మా పెద్దలు సంపాదించిన తరగని ఆస్తులు మా వెంట వున్నాయి కదా?

నేనెందుకు కష్టపడి చదవాలి, కావలసిన కోర్సులలో సీటు మా నాన్న కొనిస్తాడు కదా?

ఓ రైతు  స్వేదం చిందిస్తూ ఈ వ్యవసాయం ఎందుకు చేయాలి? ఈ పొలాలను ప్లాట్స్ గా అమ్ముకుంటే డబ్బే డబ్బు వస్తుంది  కదా?

ఈ ఆలోచనాదృక్పథంతో ఆ అప్రమేయుడియందు కర్తవ్యం నావంతు, కాపాడుట నీవంతు అనే ధోరణి కలిగివుంటారు.

పనిచేయకుండా ఉండడమే గొప్పతనం అనే భావనతో ఉండడం అనేది అకర్మణ్యత్వం కాదు. ఇది పని చేయకపోవడానికి సాకులు వెదకడం, వాస్తవానికి ఇది పనిని విడిచిపెట్టే ధోరణి. ఇది ఆటిట్యూడ్, నిర్లక్ష్యం, అనిబద్ధత, అవివేకం, బద్ధకం , సోమరితనం, నిరాసక్తత, అనాశక్తతలతో కలగలిసిన తమోగుణ స్వభావమే అవుతుంది.

పనులు చేయడంలో నిరాశక్తత కలిగివుండడం అకర్మణ్యత్వం అయితే అది పలుసందర్భాలలో అభిలషణీయమే!

పగ, ప్రతీకారం, కక్ష సాధింపులలో రగిలిపోతూ వాటిని సాధించే శక్తి, యుక్తులు, సమర్ధత పుష్కలంగవున్నా, అహంకార రహితంగా నీ సమర్ధతపై అసమర్ధుడిగా అకర్మణ్యత్వం ప్రదర్శించడం సాత్వికగుణసంపన్నుడిగా, ఉన్నతుడిగా నిన్ను తీర్చిదిద్దుతుంది.

వార్ధక్యం, అనారోగ్యకారణంగా ఏ పని చేయకపోవడం అకర్మణ్యత్వం.

శిశువు, బుద్ధిహీనుడు చేసే ఏ పనైనా అకర్మణ్యత్వమే. 

అవ్యయుడు, అప్రమేయుడు, సర్వాంతర్యామి అయిన పరమాత్మ యందు ఆరాధన, ఉపాసన, ఉపవాసం, అనన్య చింతన, అనన్యభక్తి, శ్రద్ధాసక్తులు కలిగిన నిష్క్రియాతత్వమే ఆచరణపూర్వక అకర్మణ్యత్వం. 

మనం చేసే ప్రతి పనికి కర్మఫలం ఉంటుంది. అవి చేసే పనులు సత్కర్మలు అయితే పుణ్యకర్మలుగా, చేసే పనులు దుష్కర్మలు అయితే పాపకర్మలుగా అవుతాయి. ఆ కర్మ ఫలాలు నశించే వరకు తిరిగి పలుజన్మలు తీసుకుంటూ వాటిని అనుభవించి తీరవలసిందే.  ఎవరైతే కర్మఫలాలను ఆశించకుండా నిష్కామభావనతో కర్మలను ఆచరిస్తూవుంటారో వారిని ఆ కర్మ ఫలాలు బంధించవు అనేది కర్మ సిద్ధాంతం.

జ్ఞానులు, సాధువులు , జిజ్ఞాసువులు, శాంతి కాముకులు సాత్వికగుణసంపన్నులుగా సదా కర్మలు ఆచరిస్తూనే వుంటారు, కానీ వాటి పరమార్ధం కేవలం లోకకళ్యాణం, సమాజహితంలను ఆకాంక్షిస్తూ ప్రతిఫలాపేక్ష రహితంగా ఆచరిస్తూవుంటారు, అదే అకర్మణ్యత్వం యొక్క వాస్తవదృష్టి 👁️కోణం. ఇదే బ్రహ్మచర్య దీక్ష !!!

పుణ్యక్షేత్రాలలో, ప్రార్థన మందిరాలలో, దేవాలయాలలో ఆర్తులకు, అన్నార్తులకు అందించే సహాయకచర్యలు, సేవాకార్యక్రమాలు కర్తృత్వభావనరహిత కర్మాచరణే అకర్మణ్యత్వం.

ఏ క్షణం నుంచి అయితే నీ 🧠 మస్తిష్కంలో ఆలోచనలు, మనసా, వాచ చేసే సకామకర్మలు  కేవలం ఇతరుల హితం ఆకాంక్షిస్తూ ఉంటాయో , ఆ క్షణం నుండే మనస్సులో మానవీయత 🌸వికసిస్తుంది !!! వికసిత మానవత్వంతో మానవీయుడవు, మహనీయుడవు అవుతావు!! నీవు చేసే సకామకర్మలు కూడా నిష్క్రియకర్మలుగా పరివర్తనం అవుతాయి. 

అంతఃకరణం కడిగిన స్వాతిముత్యం  అవుతుంది. అంతఃకరణశుద్ధి ద్వార మనస్సులో జ్ఞానం వికసిస్తుంది, జ్ఞాననేత్రం జాగృతి అవుతుంది. జ్ఞానోదయంద్వార పరమాత్మ తత్వం బోధపడుతుంది.

మనం విమానంలో 🛫 ప్రయాణం చేస్తున్నాం అది చాలా వేగంగా దూసుక పోతువుంటుంది అది కర్మ. కానీ విమానగమనం, ఒడిదుకులకు, టర్బులెన్స్ లకు ప్రశాంతంగా నీ 💺 సీటు లో  నిశ్చలంగా ప్రయాణం కొనసాగించే తీరు అకర్మ.  విమానంలో ప్రయాణం కొనసాగిస్తున్న ఈ ప్రయాణంలో నీవు కేవలం సాక్షి అనే భావనతో కొనసాగిస్తే అది అకర్మణ్యత్వం. 

అకర్మ అనేది మనం చేసే పని తీరును చెబితే, అకర్మణత్వం అనేది ఆ పని చేస్తున్నప్పుడు మనలో ఉండే కర్తృత్వ భావన లేని ఉన్నతస్థితి.

నిష్పక్షపాతంగా ఇచ్చే తీర్పు⚖️ అకర్మణ్యత్వం!

నిస్వార్ధరహితంగా రోగికి అందించే వైద్యం 🩺అకర్మణ్యత్వం!

న్యాయబద్ధంగా అమలు చేసే రాజదండన అకర్మణ్యత్వం!

ప్రతిఫలాపేక్షారహితంగా చేసే ప్రతికర్మ నిష్క్రియతత్వంతో కూడిన అకర్మణ్యత్వం!

ఒక జ్యోతి 🪔అనేక జ్యోతులను ప్రజ్వరిస్తూ వెలుగులను పంచుతున్నా తనలోని వెలుగు అంతే దేదీప్యమానంగా ప్రకాశిస్తు ప్రకటితం అవుతుంది. అదే విధంగా ఓ జ్ఞాని, గురువుగా ఇతరుల హృదయాంతరాలలో జ్ఞానజ్యోతి ప్రజ్వలనలకు ఆలంబనగా అవుతాడో ఆ మహానీయుడు మూర్తీభవించిన అకర్మణ్యత్వస్వరూపం!!!

పర్యావరణ 🌴పరిరక్షణ, వన్యప్రాణి 🦌సంరక్షణ, నదీజలాల 🌊పరిరక్షణ, ప్రకృతి 🌴 సమతుల్యతల సంరక్షణ, పుడమి పరిరక్షణ , జీర్ణాలయ పునరుద్ధరణ, దీనజనోద్ధరణ, అభయారణ్య పరిరక్షణ లాంటి క్రియాశీలక కార్యాలకు సమర్పితభావనతో హృదయపూర్వక చేయూత, సంఘీభావం లోకకల్యాణ యజ్ఞక్రియలవుతాయి. యజ్ఞక్రియలన్నీ నిష్కామకార్యాచరణలవుతాయి. అవి ప్రారబ్ధ కర్మ బంధనాలను కూడా దగ్ధం చేయగల ప్రభావవంతం. 

యజ్ఞక్రియలను నిష్కామకార్యాచరణస్థితిగా, అకర్మణ్యత్వభావనతో మనస్సు స్వీకరిస్తుంది. ఆ అకర్మణ్యత్వం పరమాత్మకు చేరువచేస్తుంది. 

మనస్సును ప్రశాంతభరితం చేస్తూ ఆ పరంధామం చేరుకునే ముక్తి మార్గంని సుగమం చేస్తూ ముక్తినాథుడి సన్నిధికి చేరుస్తుంది.

సర్వేజనా సుఖినోభవంతు

మీ ఆధ్యాత్మిక శ్రేయోభిలాషి

RaNa 

9900022729

🧘‍♀️🧘‍♀️🧘‍♀️🧘‍♀️🧘‍♀️🧘‍♀️🧘‍♀️🧘‍♀️

#divineguidance #yogameditation 

#yogalifestyle 

#yogainspiration #yogamitra