ఆధ్యాత్మిక మాలిక 16 అష్టైశ్వర్యాలు

అష్టైశ్వర్యాలు

కలిమి అంటే సిరి సంపదలు. నగలు, ఆభరణాలు, వజ్రాలు, బ్యాంకు డిపాజిట్లు, షేర్లు, బాండ్లు, సెక్యూరిటీలు, నగదు , హోదా, మంచి జీతం,విలాసవంతమైన బంగ్లా, ఖరీదైనకార్లే సంపదలని, అవే శాశ్వతం అనుకుంటూ వాటిని సంపాదించడం కోసం అలుపెరుగని జీవిత సమరం కొనసాగిస్తుంటాం. కానీ సత్యం ఏమిటంటే  రాత్రి వెంట పగలు లాగా కలిమి లేములు కూడా కలిసి ఉంటాయి. లేమి అంటే సంపదలు ఆవిరి కావడం. 

మనం తరుచుగా ఓ శ్రీమంతుడు బికారి కావడం, అదృష్టం కలిసి వచ్చి ఓ సామాన్యుడు శ్రీమంతుడు కావడం చూస్తున్నాం.  సంపదలు ఎవరిని ఎలా వరిస్తాయో, ఎవరిని ఎలా వంచిస్తుందో, ఎపుడు ఎవరిదగ్గరికి ఎలా వెళ్తాయో, ఏ క్షణాన ఎవరి దగ్గరనుంచి ఎలా జారుకుంటుందో ఎవరు చెప్పలేరు. అందుకనే సంపద ఉందన్న గర్వం కలిగివుండడం అవివేకం.

‘కలిమి లేములు, కష్ట సుఖాలు కావడికుండలోయ్’ అనే సినీగీతం నేటికి మనందరి మదిలో గింగిరాలు తిరుగుతోంది. కలిమి లేముల ప్రభావరహితంగా  సంపూర్ణ మైన, ఆనందమయమైన జీవితానికి కావాల్సినవిఅష్టైశ్వర్యాలు అవే నిజమైన సిరి సంపదలు. అవి:

ధనం: 

భోగభాగ్యాలు,ఆర్ధిక స్థిరత్వంలని తీసుకువస్తుంది. అయితే ఆ సంపాదన న్యాయబద్ధంగా,ధర్మార్జనగా ఉంటే అది ఎనలేని ఆత్మసంతోషాన్నితెస్తుంది.

సంపాదన కేవలం కూడ పెట్టడానికే కాదు. ఆర్తులకు సహాయం చేసేదిగా ఉండాలి. దాన,ధర్మాలతో సంపాదనవిలువ దిగ్వునీకృతం అవుతుంది. దానం డబ్బుతోనే కాదు, మనసుతో కూడా చేయగలగాలి. ఒక మంచిమాట, ఓదార్పు, ఆకలి,దాహం తీర్చడం కూడా దానమే. మనస్సు విశాలం అయితే దానం సహజంగా వస్తుంది. అపాత్రదానం ద్వారాఫలితం శూన్యం.ఎదుటి వ్యక్తి క్షేమం ఆకాంక్షిస్తూ చేసే సహాయం ఆనందంని మాత్రమే కలిగిస్తుంది!!ఆడంబరాలను దూరంగా వుంటూ చేసే పొదుపు భవిష్యత్తును సుఖప్రదం చేస్తుంది. అదే లోభత్వం అయితే అడవిగాచిన వెన్నెల అవుతుంది. దానధర్మాలు తెలియని సంపాదన ఆకాశంలో వర్షించని మేఘం, ఎండమావి, దప్పిక తీర్చలేని సముద్రంలోని నీరు వంటివి.

ప్రతిష్ఠ:  

మనం చేసే దానధర్మాలు,పుణ్యకార్యాలు,సేవాకార్యక్రమాలు, సత్కర్మలు,నిష్కామ కర్మలు, లోకహితం,సమాజశ్రేయస్సును ఆకాంక్షిస్తూ నిర్వహించే యజ్ఞక్రియలు, క్రియాశీలక జీవితంగా కొనసాగితే   అవి సమాజంలో మంచి పేరు, గౌరవం ప్రతిష్టలను తీసుకువస్తూ జీవితాన్ని ఆనందమయం చేస్తాయి. 

 కేవలం పేరు, ప్రతిష్ఠలు,గుర్తింపుల కోసం తాపత్రయపడుతూ చేసే ఏ కార్యం అయినా అశ్రద్ధదానం అవుతూ అప్రతిష్టకు దారితీస్తుంది. రాజకీయ నాయకులు ఎన్నికల సమయాల్లో చేసే వాగ్దానాలు, హామీలు ఇటువంటి కోవకు చెందుతాయి.

ఇల్లాలు: 

అనురాగం, అన్యోన్య దాంపత్యం, సుఖదుఃఖాల్లో తోడు నీడగా ఉండే సహధర్మచారిణి జీవితాన్ని సుఖమయం చేస్తుంది. 

తన భర్తను మహారాజుగా చూస్తూ అతని హృదయంలో మహారాణిగా ఆసీనురాలవుతూ ఆదర్శవంతమైన వైవాహిక జీవితాన్ని గడుపుతుంది. ఆదర్శ కుటుంభంగా వికసిస్తుంది. ఇంటికి దీపం ఇల్లాలుగా ప్రకాశిస్తుంది. 

ప్రతి గృహస్థుడు ధర్మబద్ధంగా, ఏకపత్నీవ్రతుడుగా, నీతివంతమైన జీవితం గడుపుతూ ఆదర్శప్రాయంగా గృహస్తుజీవితం కొనసాగిస్తే ఆ గృహం ఆనందనిలయం అవుతుంది.

సంతానం: 

విద్య వినయ విధేయతలతో సంస్కారభరితమైన విలువలతో కూడిన భాద్యతాయుతమైన పెంపకంతో నవసమాజ నిర్మాణానికి, నవశకానికి అదర్శప్రాయులుగా వారి భవిష్యత్తుని తీర్చిదిద్దడంలో తల్లిదండ్రులుగా బాధ్యతతో వ్యవహరించాలి. 

సంస్కారం ఉంటే సంపదలు లేకపోయినా జీవితం సంతోషంగా సాగుతుంది. సంపదలు ఉండి సంస్కారరహితం అయితే బ్రతుకు దుర్భరం అవుతుంది.

వయస్సులో ఉన్న పిల్లల నడవడికను నిశితంగా గమనిస్తూ అవసరమైతే మీ విలువైన సలహాలతో వారిని ఉత్తమ భావిపౌరులుగా తీర్చిదిద్దాలి. 

బాల్యంలో శిక్షణ, కౌమారంలో క్రమశిక్షణకు అలవాటైన సంతానం మిమ్మల్ని ప్రేమతో గౌరవిస్తూ మీ వంశ ప్రతిష్టను బరువు బాధ్యతలను హృదయపూర్వకంగా స్వీకరిస్తూ సమాజానికి ఉపయోగపడే చిరుదివ్వేలుగా ప్రకాశిస్తారు. వార్ధక్యంలో రక్షణగా ఉంటారు.

ధైర్యం

ధైర్యం అంటే సానుకూల దృక్పథం, భావోద్వేగాలతో జీవితంలో ఎదురయ్యే సంఘటలను , ప్రతిబంధకాలను, సమస్యలను, కష్టానష్టాలను, చాలెంజిగా స్వీకరిస్తు ప్రతిసవాళ్లను మొక్కవోని ధైర్యంతో ఎదుర్కోవడం. 

సమస్యలను సమర్ధవంతంగా పరిష్కరించుకుంటూ అలుపెరుగని బాటసారిలా ముందడుగు వేయడం. 

అటువంటి క్రియాశీలక వ్యక్తులు వారి వారి రంగాల్లో, వృత్తుల్లో , పదవుల్లో ఉన్నత శిఖరాలను అధిరోహిస్తూ విజయకేతనాలను ఎగురవేస్తూ నూతన ఒరవడికి నాంది పలికే మహనీయులుగా స్ఫూర్తివంతమైన నాయకత్వంతో అందరికీ స్ఫూర్తిదాయకంగా, ఆదర్శంగా నిలుస్తారు.

అప్రమేయుడు, సర్వాంతర్యామి అయిన పరమాత్మ “క్షుద్రం హృదయదౌర్భల్యం త్యక్త్వో త్తిష్ఠ పరంపత” అని ప్రబోధించారు. పిరికితనంను వదిలివేయి, ధైర్యంగా విశ్వాసంతో నీ కార్యకలాపాలు ధర్మబద్ధంగా నిర్వహించు, విజయ పరంపరను కొనసాగించు. ఉత్సాహం,సాహసం,ధైర్యం,సద్బుద్ధి,శక్తి,పరాక్రమం ఎక్కడవుంటాయో అక్కడే పరమాత్మ అనుగ్రహం దిగ్విజయరూపంలో ప్రకాశిస్తూ ప్రకటితం అవుతుంది.

స్థైర్యం:

మానసిక దృఢత్వం,దృఢనిశ్చయం,ఏకాగ్రత, పట్టుదల,మనోబలంల మేలుకలయికనే మనో స్థైర్యంలో ప్రతిబింబిస్తుంది. 

తార్కిక వివేక విచక్షణా జ్ఞానం, ఆత్మవిశ్వాసం,అంకితభావం, కృషి దీక్షతలతో ఏ పనినైనా  తమ ప్రజ్ఞ,మేధస్సులతో సమర్థవంతంగా నిర్వర్తించే సామర్థ్యం క్రియాశీలకంగా ప్రస్ఫుటమవుతుంది.

ఎంత అరగదీసినా గంధంచెక్క పరిమళం మనోహరమే, జీవితం ఎన్ని సవాళ్లు విసిరినా, ఎన్ని ఆటంకాలు ఎదురైనా మనోస్థైర్యం కోల్పోకుండా వుండేది ధీరత్వం.

విద్య : 

ఏది అయితే తెలుసుకున్నాక ఇక తెలుసుకోవలసిన విషయ పరిజ్ఞానం వుండదో అటువంటి విశేషజ్ఞానమే ఆధ్యాత్మిక విద్య. అది విద్యలలో ఉత్కృష్టమైన,శ్రేష్ఠమైన జ్ఞానసంపద. 

మనం చదివే చదువులు, డిగ్రీలు,ఉన్నత విద్యలు అవి కేవలం జీవనభృతి కోసం మాత్రమే. నేటి విద్యావ్యవస్థలో చిన్నారులు శక్తికి మించిన భారంతో తీవ్ర ఆందోళనకు లోనవుతున్నారు. 

నిజానికి  జ్ఞానం పుస్తకాలలో మాత్రమే వుండేది కాదు, అది అనుభవాలతో జీవిత పాఠాలుగా సమకూరేది. తప్పులే చేయని ఆదర్శ జీవితం వుండనే వుండదు, ఆ తప్పులనుంచే గుణపాఠాలు, నిజమైన జ్ఞానం వస్తుంది. అది తార్కిక,వివేక, విచక్షణ జ్ఠానంతో నిత్యమై,సత్యమై ప్రకాశవంతంగా వుంటుంది.

వినయం: 

విద్య ఎవరిలోనైనా వినయ సంపదగా ప్రకటితమవుతూ ప్రకాశించాలి, అంతేకానీ అహంకారం, అహంభావసహితంగా ఉంటే అది శోభించదు, రాణించదు. 

మాటలలో సౌమ్యత, ప్రవర్తనలో మృదుత్వం, చేతనలలో లాలిత్యంతో కూడిన వ్యక్తిత్వం వన్నె తెస్తూ అందరిలో  ప్రత్యేక గుర్తింపు, గౌరవాన్ని తెస్తుంది.

తరగని ఆనంద సిరులు అయిన ఈ అష్టైశ్వర్యాలను అనుగ్రహించమని ఆ సర్వేశ్వరుడు, అప్రమేయుడు అయిన భగవంతుని అంతఃకరణ శుద్ధితో, మనఃపూర్తిగా వేడుకోవాలి, భక్తితో నివేదించుకోవాలి, హృదయపూర్వకంగా విన్నవించుకోవాలి.

జీవితంలో సంతోష సమయాలను అనందగా ఆస్వాదించాలి. కష్ట సమయాల్లో ఇవి శాశ్వతం కావు ముందు ముందు అన్ని మంచిరోజులే అనే భావనతో వాటిని సవాళ్లుగా స్వీకరించి ముందడుగు వేయాలి. సానుకూల ఆలోచనలను మనస్సు స్వీకరిస్తూ అదే మార్గంలో స్పందిస్తుంది.

అందమైన పూలతోట సువాసనలతో మత్తెకిస్తూ తన అందాలతో కనువిందు చేస్తుంది, సానుకూల భావనలు మనస్సులో నింపుకుంటే మనసే నందనవనంగా గుబాళిస్తుంది.

ఆనందంగా ఉంటే అనారోగ్యాలు దరిచేరవు, సానుకూల దృక్పథం, భావనలతో మనస్సు ప్రశాంత భరితం అవుతుంది, జీవితం సంతోషకరంగా మారుతుంది.

మనశ్శాంతి, ఆరోగ్యం, మంచి మనస్సు, మంచి కుటుంబం, సంతోషకరమైన జీవితం, ప్రేమమయమైన వైవాహిక జీవితం, పేరు ప్రఖ్యాతులే నిజమైన ఐశ్వర్య రూపాలు, ఇవి ఉంటే జీవితం సంపూర్ణం, పరిపూర్ణం.

సర్వేజనా సుఖినోభవంతు

మీ 

ఆధ్యాత్మిక శ్రేయోభిలాషి

RaNa 

9900022729

🧘‍♀️ 🧘‍♀️ 🧘‍♀️ 🧘‍♀️ 🧘‍♀️ 🧘‍♀️ 🧘‍♀️